Den da’dua pia baine massiulu’ disanga Banne Liling na Banne Oki. iate pia baine sola duai den tu sipa’ kadakena iamotu kabokob oko. Ia ke denni apa nananna to matuanna moi umba napannhi tarru’ naboko sola duai. Nenne’ bangmo nata’tan sia na adai’ tomatuanna apa tangma’perangi

 Belanna tang naissanmo to matuanna unnada’i, sipa’kada-kadami kumua la napatumbamira te anakna. Katampakanna nasituru’i indo’ ambe’na la nagaragan buria’ kapua la nanii untarungkui. Tonna marassanmo tu ambe’na unggaragai tu buria’ kapua, saemi tu anakna sola duai mekutana nakua: “La dipatumbari tu ambe’.” Mebalimi tu ambena nakua: “iate buria’ kapua la dinii ungkurung manukta belanna male bang ungkande parena tau.” Mekutanaomi tu anakna nakua: “La tama siaraka buria’ tu mintu’ manukta belanna bu’dak.” Nakuami ambe’na :
“Mentamakomike, iammi silasa sola dua kumuku lan, siagimoto tu manukta.” Mentama tonganmi buria’ te pia sola duai. iatonna lanmo sola duai ta’pa natutu’ ambe’na tu buria’ anna ma’kada nakua: “Kamumo sola dua tu la dikurung belanna mukkun bangkomi kaboko-boko.
La dikurungkomi sae lako mepare pole’pi tau.” Dimanda’imi tutu’na tu buria’ anna disua tu nene’na ungkampai, apa iate nene’na tang pakitamo.
Iatonna mantananmo tu tau. mekutanami tu Banne Liling sola Banne Oki’ nakua: “Ma’apamira tau.” Mebali tu ambe’na nakua: “Mane pariu.” Tonna sunmo tu pare, mekutanaomi tu anakna nakua :
“Ma’apamora tu tau.” Nakuami ambena: Mane mantanan.” Tae’ namasai lendu’na mekutana pole’omi tu anakna nakua: “Ma’apamora tu tau.” Napakenaomi ambe’na nakua: “Mane tukku tu pare.”
Anna sitonganna attu iato masarra’mo tu tau mepare. Pakalan narangimi te pia sola duai tu sengo biasa diposengo ke pepareammi. Sipa’kada-kadami te pia sola duai nakua: “Napakenaki’ pole’ indo’ ambe’ta. tadaka’mo lalan anta tassu’ lan mai te kurungan tatampei te banua iate.”
Napakenami tu nene’na tu disua ungkampai nakua :
“Benpakanni tu pisomi nene’ kipoloampi kanukungki belanna kerara-rara bangmo tu kaleki ke mengkayokkan.” Belanna buta tu nene’na nabenni tu piso Ian sepu’na. Nasanggangmi sola duai tu buria’ anna tassu’ lan mai kurungan leak male umpallaian kalena. Tonna malemo mallai  sitammumi tau dio tangnga lalan. Malemi tu to nasitammuan umpokadanni ambe’na sola indo’na kumua sitammukan tu anakmi dio tangnga lalan. Dolomi sule tu indo’na lako banua naapparanni tuburia’ sanggang sia pa’de tonganmo tu anakna.
 Malemi tu indo’na unnula’i apa natiro mambe’lakmora. Napematira’imi lumingka tu indo’na naurunganni samandappi’-dappi’na tu anakna.
Iatonna tiromi sola duai kumua mandappi’mo tu indo’na, nakuami tu Banne Liling lako Banne Oki’: “Ka’tuanni tu manikmu ammu sasuanni rokko lalan.” Tonna lambi’ indo’na tu manik tiseran dio lalan, torromi naruruk. Leakomo male mambela sola duai anna lambi’ tu batu kapua. Massengomi sola dua nakua:
 “Batu tongkon, batu tongkon
 make’ tibangngako kale’
 tibungka’ tipa’duako
 anna tama Banne Liling
 la sisola Banne Oki’.”
 Mengangami tu batu anna olai sola duai tama. Mangka to sikemunmi tu batu sule. Iatonna rampo tu indo’na natambaimi kumua anna tassu’ lan mai batu. Apa den gamara narangi lan mai bat nakua:
 “Masiangpa mimane sae unnalakan.” Iatonna masiangmo, saemi tu indo’na anna massengo-sengo dio to’ batu. Mengangami tu batu apa tangia anakna tu tassu’ sangadinna bu’ku’ belanna mendadi bu’ku’mo tu anakna. Sule lo’bangmi lako banuanna situang kapussakanna.
 Mengangami tu batu anna olai sola duai tama. Mangka to sikemunmi tu batu sule. Iatonna rampo tu indo’na natambaimi kumua anna tassu’ lan mai batu. Apa den gamara narangi lan mai bat nakua:
 “Masiangpa mimane sae unnalakan.” Iatonna masiangmo, saemi tu indo’na anna massengo-sengo dio to’ batu. Mengangami tu batu apa tangia anakna tu tassu’ sangadinna bu’ku’ belanna mendadi bu’ku’mo tu anakna. Sule lo’bangmi lako banuanna situang kapussakanna.

“Iamoto na iatu Bu’ku’ ma’manik tu barokona”

S: Toraya Tondok Kadadiangku

Categories: Budaya Toraja