Kumpulan Teks Ma’parapa’ dalam Ibadah

Pa’parapa’ Lan Kamenomban Allo Minggu

Kurre..kurre..kurre..sumanga’na langan Puang di Matua
pole..pole..pole…parayanna rekke kapenombanta
Iamo Puang Tallu Sangbua Bannang
Dipentionganni sukaran alukna,
dipelalundunni sangka’ makaraeng-Na
menggaronto’ ilan Yesu Kristus.

Kurre sumanga’na inde allo masero pindan
Pole parayanna inde kulla’ mabase bulaan
iamo allo nabasei suru’ Puang di Matua,
kulla’ napandanni sara’ka’ Kapenomban
tani umpakala’bi’ Totumampata
Ia umpakaraya kamalimbangunan-Na Yesu Kristus.

Maimokomi..e..to sangdunduan pindan!
Inde mokomi e.to sangirusan gori-gori
anta tendeng puang Matua
ta pakala’bi’ tu sanganna Kapenombanta
Maikomi tara’ban-ra’ban umpenanian Puang,
anta unnarrak umpudi buntu batu oto’na kasalamaranta.
Maikomi anta ma’kurre sumanga’ umpennoloi oloNa,
sia mela’tek umpakendekanni pa’pudian.

Maikomi anta tukku menomba,
anta malinguntu’ dio oloNa Puang Totumampata;
Belanna iamo Kapenombanta.
Sia kita tu bangsa nakambi’, sia domba Napelisu pala’.
Melo kemiperangii tu gamaranNa te allo totemo!

Pangakuan kasalan ilan kamenomban kurrean sumanga’ Tallu Lolona/Sangtaun Pare

Puang E! Puang E! Puang E!
Puang Matua kipatongan Tallu sangbua bannang
Kitete manikki komi kurrean sumanga’ ilan te allo totemo
Ki eran balannikki komi polean paraya,
ilan te kulla’ tomarassan!
Angki parannu paiman sende pakaduan dio olomi!
Apa mempala’ patomalipakan dio olo mala’bi’Mi
ilan kapentuarasan, angki Ma’sossoran rengnge
mangole tanda tinaran ilan kapengkatobaran

Kumua: da’ mipasisurungkan lindo alukki,
sia da’mi papakkanni ukungan tu penggauran kadakeki,
sangadinna pa’dei tu kasalangki
sia pagarri’ tu kapatodo tintinganki
ilan sanganna Yesu Kristus. Amin

Pangakuan kasalan ilan kapenomban urrara tongkonan layuk

Puang E! Puang E! Puang E!
Puang kipentionganni sukaran aluk-Na,
kipelalundunni sangka’ sura’ madatunna.
Ilan te pangrampasan bulaanna tongkonan layuk,
Ilan te pangrantean manikna esungan pa’kalandoan,
Angki sae tuara’ sisola mintu’ taruk bulaanna te tongkonan,
angki tu’tun ma’palidan angganna lolosu kandaurena inde esungan pa’kalandoan,
mangole tanda tinaran dio olo mala’bi’ Mi.
Kumua: O Puang pa’dei tu kapatodo tintinganki
sia samboi tu sala budangki
da’mi rekenni Puang tu kakadakeangki
sola kakalando pa’duan lan ba’tengki,
angki sielle’ parannu paiman angki sipato’ sila’tekan ma’bulo lollong dio olo mala’bi’ Mi! Lan sanganna Yesu Kristus. Amin

Pangakuan kasalan ilan kamenomban ungkurre sumanga batu a’riri

Puang E! Puang E! Puang E! Puang ki pentionganni sukaran alukna kipellalundunni sangka’ sura’ madatunna. Tlan te ulu ba’bana lando longa, ilan tepaladan malona’na batu a’riri angki sae mentura sisola mintu to ma’rapu tallang, angki tu’tun ma’palidan makalimma’na to ma’ kaponan ao’: kumua untuarasanmo’ kasalanku mati’ kalemi sia tae’ angku buni kakadakeangku kukuami ma’ kada: la unnakuna’ kapatodo tintinganku lako Puang Ammi pa’deimi tu kakadakeangku sia kasalangku, (Pa’pudian 32:5)

Angki sielle’ parannu paiman, angki sipato’ sila’tekan ma’bulo lollong dio olo mala’bi’Mi. Ilan sanganNa Yesu Kristus. Amin

Kada dibaenan ilan kamenomban urrara tongkonan layuk

Kurre…kurre…kurre.. sumanga’na Langngan Puang diMatua,
Saba’..saba’ parayanna rekke kapenomban tallu sangbua’ bannang!

Kurre sumanga’na inde allo masero pindan saba’ parayanna inde kulla’ mabase bulaan iamo allo natanda balo’ taruk bulaanna te tongkonan layuk. lamo kulla’ nalinde maya-maya lolo sumanik kandaurena inde esungan pa’kalandoan sugi’ tongkonan… (sebut nama tongkonan). Iamo tongkonan untaranak sangka’ ilan te tangngana tondok, iamo esungan pa’kalandoan sugi’ ussaladan pasiban bisara ilan lili’na pangleon. Bendanmo ungkallo langi’, tunannangmo untongloi tondok.

Koe….Ladipalesso’ samayannamo ilan te allo to temo. La dipamarimbangunmo torroan maelona ilan tingayo mala’bi’Na totumampa rara’ta ilan te kulla’ to marassan..! dikua denoupa’ anna mintu’ taruk bulaanna te tongkonan lamakaritutu unnola gau’ masallo’. Anna angga makalima’na lolo sumanik kandaurena inde pa’kalandoan sugi’. La lolang ma’bulo lollong dio olona Puang Matua. Anna bendan paloloan sangka’ lante tangngana tondok, anna tunannang pembalabaran bisara’ ilan te palisunna pangleon.

Koe…. La dipalesso’ samayannamo te tongkonan layuk: ussabu’ sanganna Puang la dipamarimbanganmo torroan madatunna te esungan pa’ kalandoan la unggente pa’gantianan bulaanna totumampa rara’ta: inde tongkonan ladipamaindan moko..

e..ikote pa’kalandoan sugi eee.. ladipamadatu moko lan sanganna Puang Matua Ambe’ Puang Yesu Anak Tungga’na, na Puang Penaa Masallo’ to pakarimmanannta. Kurre…kurre..kurre sumanga’na.

Kada di baenan ilan kamenomban urrara tongkonan batu a’riri

Kurre sumanga’na langngan Puang diMatua, saba’ parayanna rekke totumampa rara’ta.

Kurre sumanga’na inde allo masero pindan saba’ parayanna inde kulla’ mabase bulaan.

lamo allo dinei untimang pakkan passakkena Puang! lamno kulla’ dinei ussarande kaeran kaboro’na totumampata.

Anna bendan melomo inde batu a’rari tunannang tangsakkalanganmo inde esungan banua tiku tambenna. Diangkarammi ada’na papa dirassa situru’ kada Puang! Di pakendekmi pangurande-randean menggaronto’ ilan luntara’ makaraengna to tumampata!

Nakua: kada Puang bisaranna kapenombanta: iake tae’i anna Puang umbangunni tu banua manassa tae’ gai’na tu kabo’yoranna pande.

e..kamu to ma’rapu tallang daomai tongkonan e.. makalima’mi to ma’kaponan ao’ daomai te batua’riri ee… tongkonan..(sebut nama tongkonan).

Kataku’I tu Puang Matua sia kasiri’ii tu lalanna. Anna tontong passakkena Puang, daomai tongkonan. Anna nenne ra’pak-ra’pakna kapenombanta lolong minna’ daomai te batu a’riri. Rongko’ toding sola nasang toma’rapu tallang, sitaranak rupa madarinding angga to ma’kaponan ao’.

La kupalesso’ samayannamo te tongkonan, lakupamarimbanganmo kabendananna te batu a’riri lan sanganna: Puang Matua Ambe’, Puang Yesu anak tungga’Na, na Puang Penaa Masallo’. Ammi masakke mairi’, marudindin solanasang. Amin

Kada di baenan ilan kamenomban ungkurre sumanga onganan banua ba’ru

Kurre sumanga’na langngan Puang DiMatua.
Pole…pole parayanna rekke totumampata. lamo Puang Tallu sangbua’ bannang!
Puang mentiro tiku ma’mata lumele lako angga panampana!
Belanna mangka marampa’mo te onganan banua tepu tangsakkalanganm0 te osokan pentionganan tiku tambenna.
Diangkaranmi te kurrean sumanga’, dipakendekmi te polean paraya: nakua kada Puang bisara kapenombanta: minda-minda tu umpennoloan pa’kurre sumanga iamo umpakala”‘bi’na, sia iatu to malolo lalanna, lakupakitan kasalamaran lu dio mai Puang Matua (pa’pudian 50:23) Inde onganan banua, inde osokan pentionganan: tu napabendan sia ambe’ (sebut nama penghuni)

Ladipamaindanmo, ladipamarimbangunmo, lan sanganna: Puang Matua Ambe’, Puang Yesu Anak Tungga’na na Puang penaa Masallo’ to pakarimmananta. Amin

Kada di baenan lan kamenomban massabu patane/liang

Kurre sumanga’na langngan Puang di Matua pole parayanna rekke kapenombanta kurre sumanga’na allo maelo.

Pole parayanna kulla’ madaridinding. Kurre sumanga’ kada sangkutu’ banne pole parayanna bisara misa’ buanganna. Anna mangka marampa’mo te patane/liang iamo digente’ banua tangmerambu. Napasakka’ toma’rapu lanani untayan kasaeanna Yesu Kristus.

Naola kada turu’na to ma’rapu umpolalan bisara misa’ buanganna diomai to ma’kapoanan ao (dao mai tongkonan..)

Ladipamaindanmo ilan te allo totemo, ladipamarimbanganmo ilante kulla’ tomarassan menggaronto’ ilan sanganna Puang Matua Ambe’ Puang Yesu Anak Tungga’na na Puang Penaa Masallo’. Amin.

Sumber: Buku Liturgi Gereja Toraja

Tinggalkan Balasan

Alamat email Anda tidak akan dipublikasikan. Ruas yang wajib ditandai *